Ykbalyma galam berdi Ýaradan,
Oň jebri-jepasy agdyrdy eňki.
Tüm gijeler bagrym ezip döreden,
Eziz Watan,
Aýdymlarym seniňki.

Mukamyňa on iki süňňüm gowşady,
Pikir hyýalymam däl indi öňki.
Ýaşyl geýen ýazlaryňa bagş eden,
Eziz Watan,
Aýdymlarym seniňki.

Bitarap sen, Berkarar sen,
Bagtly sen,
Muňa şaýat bu zeminiň dört çüňki.
Mähir beren gujagyňda bagtly men,
Eziz Watan,
Aýdymlarym seniňki.

Habar alan halsyzlaryň halyndan,
Hem solan güllere bagş eden reňki.
Betpäli gaýtaran ýaman pälinden,
Eziz Watan,
Aýdymlarym seniňki.

Kalba azar berýän, bilmedim neden,
Ýazanu-ýazmadyk, öňküdir soňky.
Meniň bar baýlygym işbu dünýede,
Eziz Watan,
Aýdymlarym seniňki.

ŞÄHRIBOSSAN