Eý gül watan almalaryň, narlaryň eziz maňa,
Meň söýgim müň ömre ýeter, barlaryň eziz maňa.
***
Ulus-ile aman-esen ýaz gelende ajaýyp,
Sähra üste seýkin basan hüýrleriň eziz maňa.
***
“Ber Hak” diýen bir özüne, nalyş edip säherler,
“Bir Hak” diýen takwalaryň, pirleriň eziz maňa.
***
Haýranda başy ýaýkasam, çykyp belent daglyga,
Düşüp bagrymy oýkasam, garlaryň eziz maňa.
***
Bu topragy jandan söýen, başyn goýjak üstünde,
“Men-men” diýen söwer dosty-ýarlaryň eziz maňa.
***
Seň goýnuňda beýnim bekäp, dünýä akyl ýetirdim,
Ata mekan eýwanlaryň, törleriň eziz maňa.
***
Bahar gelse, mahmal geýen, bu owadan dünýäniň,
Waspyn ýaýan dutarlaryň, tarlaryň eziz maňa.
***
Üstünden geçdi nije jan, nijesi bagş etdi jan,
Beg Görogly hem Oguz han, ärleriň eziz maňa.
